Batas vs office bullying

Hindi lang sa eskuwelahan may bully, kahit na sa office.

Kaya nais ni Ako Bicol Partylist Rep Rodel Batocabe na maisabatas ang Anti-Office Bullying bill (HB00815) na nakabinbin sa House committee on civil service and professional regulation.

Inalis si Batangas Rep Vilma Sanrtos-Recto bilang chairman ng naturang komite matapos na bumoto laban sa Death Penalty bill.

“The enactment of this proposed bill would generate policies inhibiting employees and employers from performing acts that would cause lasting damages to their peers and co-workers,” ani Batocabe.

Umaasa si Batocabe na magtatalaga na ang liderato ng Kamara ng kapalit ni Recto at ng iba ang mga inalis upang makapagtrabaho na ang mga komite.

“We want a workplace free from any forms of discrimination and judgment, unmindful to race, ethnic origin, religion, sexual orientation, gender identity, social status, age, and political beliefs,” ani Batocabe. “Bullying in the workplace is often overlooked and unheeded by organizations, human resource managers and administrative personnel until it results to irremediable damage to our workers.”

Sa ilalim ng panukala, ang bawat pribadong kompanya o ahensya ng gobyerno ay maglalatag ng guidelines kaugnay ng office bullying.

“It breeds a hostile work environment for everyone in the office and infringes on the rights of other people in the work premises. It often disrupts the order and peace in workplaces.”

Kasama sa parurusahan ang nagkakalat ng tsismis at credit grabbing.

Droga, pangunahing dahilan sa pagpapaliban ng barangay election

Narco-politics ang nakikitang dahilan ng mga mambabatas na posibleng mag-iimpluwensya sa darating na synchronized barangay at SK elections kaya’t masusing pinag-aaralan ng House committee on suffrage and electoral reforms ang tatlong panukala na naglalayong ipagpaliban ang halalang pambarangay na nakatakdang ganapin ngayong buwan ng Oktubre bilang suporta sa kampanya ni Pangulong Duterte laban sa droga.

Sinabi ni CIBAC Partylist Rep Sherwin Tugna, chairman ng komite, na kanilang titiyakin na walang lalabagin sa Saligang Batas ang planong pagpapaliban sa nakatakdang halalan kungdi tugunan ang nakakaalarmang malawak na kaugnayan ng iligal na droga na kinasasangkutan ng mga opisyales at kabataan na namumuno sa mga barangay.

Kaugnay nito ay pag-aaralan din ang pagtatalaga ng officers-in-charge sa barangay sa pagtatapos ng termino ng mga nakaupong opisyales.

Ang mga panukalang tatalakayin ng komite ay ang HB05359, HB05361 at HB05380, na iniakda nina Surigao del Norte Reps Robert Ace S. Barbers, Marinque Rep Lord Allan Q. Velasco, at ANAC-IP Partylist Rep Jose T. Panganiban Jr., ayon sa pagkakasunod, at naglalayong ipagpaliban ang October 2017 Barangay at Sangguniang Kabataan Elections, at ang pagtatakda nito sa ika-4 na Lunes ng Oktubre 2018.

Ang mga susunod na petsa ng bawa’t halalan ay isasagawa matapos ang tatlong taon.

Nakasaad din sa mga panukala na bibigyan ng kapangyarihan si Pangulong Duterte na magtalaga ng mga pansamantalang opisyales sa babakantehing posisyon sa pagtatapos ng termino ng mga nakaupong opisyales hanggang sa petsa ng itinakdang halalan sa taong 2018.

Ayon kay Rep Barbers, chairman ng House committee on dangerous drugs, ang barangay ang sandigan ng mga ordinaryong mamamayan sa mapayapang pamumuhay sa pamayanan kaya’t nararapat lamang na ang mga naglilingkod na opisyales dito ang pangunahing tagapagtanggol at tagasulong ng kampanya ng pamahalaan laban sa droga.

Subali’t papaano maisusulong ang laban kontra droga kung mismong ang mga opisyales ng barangay ang mga protektor nito. Idinagdag niya na mismong si Pangulong Duterte ang nagnanais na ipagpaliban ang halalan sa barangay dahil ayaw niyang magwagi ang mga kandidatong protektado ng drug money.

Naniniwala si Panganiban na talamak na ang iligal na droga sa buong bansa at laganap na ito sa pangunahing institusyon ng pamahalaan, ang barangay, na hindi mapapabulaanan ng mga ulat na umaabot na sa 40,000 barangay officials ang sangkot sa droga.

Sinabi ni Velasco, chairman ng committee on energy, na dapat lang na ipagpaliban ang halalang pambarangay ngayong taon at ang pagtatakda nito sa lalong madaling panahon upang mapaghandaan ito ng maigi ng pamahalaan at ng mga mamamayan.

Dapat din aniya na ikonsidera sa pagpapaliban ng barangay elections ang pagtatakda nito sa parehong petsa ng national presidential elections dahil sa posibleng dagdag na gastos sa pondong inilalaan para dito.

Validity ng driver’s license, gagawing limang taon

Bilang tugon sa panawagan ni Pangulong Rodrigo Roa Duterte na pabilisin ang serbisyo ng mga tanggapan ng pamahalaan sa mga mamamayan at maalis na ang mahahabang pila at mga iregularidad partikular na ang pagkuha at renewal ng lisensya sa Land Transportation Office (LTO) ay bumuo ng technical working groups ang House committee on transportation na pinamumunuan ni Samar Rep Cesar V. Sarmiento.

Babalangkasin ng komite ang iba’t ibang panukala na naglalayong pahabain ang validity ng drivers’ license mula sa tatlo tungo sa limang taon upang mapaluwag na ang pagsisikip sa mga tanggapan ng LTO.

Isa sa binuong technical working group (TWG) na pamumunuan ni Surigao del Sur Rep Johnny Ty Pimentel ay tatalakay sa mga panukalang inihain ng mga mambabatas tulad ng HB02542 na inihain ni Pimentel, HB 2294 ni Antipolo City Rep Romeo M. Acop, HB01952 na iniakda ni Batangas Rep Vilma Santos-Recto, HB01996 ni Quezon Rep Angelina D.L. Tan, HB02152 na inihain 1-PACMAN Partylist Rep Enrico A. Pineda, HB02817 ni Nueva Ecija Rep Estrellita B. Suansing at HB04627 na iniakda ni Deputy Speaker Rolando G. Andaya, Jr.

Sinabi ni Sarmiento na layunin ng pitong panukala na tugunan ang mga suliraning kinakaharap ng LTO tulad ng mga reklamo sa kakulangan plastic cards at mga usaping legal sa kontrata ng pagsusupply ng cards.

Kasama dito ang pagpapairal ng mas mahigpit na patakaran sa pagkuha ng lisensya upang matiyak na ang bibigyan ng lisensya ay sumasailalim sa masusing pagsusulit para maipairal ang mahigpit na disiplina sa mga tsuper at mabigyan sila ng sapat na kaalaman hindi lamang sa mga batas trapiko kungdi ang paghuhubog din sa maayos na asal at kaugalian ng mga tsuper partikular na ang mga nagmamaneho ng mga pampublikong sasakyan tulad ng tricycles, jeepneys, buses, taxis, trucks at delivery services.

Naniniwala si Pimentel na kapag naisabatas ang mga panukala ay magiging episyente ang tanggapan ng LTO dahil mababawasan na ang haba ng pila sa pagkuha at renewal ng lisensya dahil mas mahaba na ang validity nito. Bukod dito ay mabibigyan ng sapat na panahon ang mga bago pa lamang kumukuha ng lisensya.   

Ayon kay LTO chief Assistant Secretary Edgar Galvante, sinimulan na ng kanilang tanggapan ang extension ng validity ng driver’s license simula pa noong buwan ng Oktubre 2016 kaya’t positibong sinusuportahan ng LTO ang panukala dahil mapagtitibay nito ang mahalagang layunin kapag ganap na itong naisabatas.

RH law, nanganganib sa pagka-ubos ng contraceptives

Nangangamba ang mga kababaihan sa mabilis na pagka ubos ng contraceptive supplies at mga kahalintulad na gamot sa merkado na nagbabanta ng panganib hindi lamang para sa birth control kungdi pati na rin lunas sa iba’t ibang sakit ng mga ina ng tahanan.

Nagbabala si House Deputy Speaker Pia S. Cayetano sa dinaluhang forum sa harap ng mga mamahayag sa Taguig City na kapag hindi inalis ang temporary restraining order (TRO) sa pagsesertipika ng mga contraceptive products sa bansa ay tuluyan na itong mauubos sa taong 2020 at malalagay sa panganib ang kalusugan ng mga kababaihan na umaasa sa lunas na hatid ng mga ito sa iba’t ibang karamdaman.

Matatandaang naglabas ang Kataastaasang Hukuman ng kontrobersyal na TRO noong ika-17 ng Hunyo, 2015, na nagbabawal sa Food and Drugs Administration (FDA) na mag isyu ng certificate of registration para sa iba’t ibang contraceptives na isang rekisito ng ahensya bago ito maibenta sa merkado.

Sinabi ni Cayetano, pangunahing may-akda ng Reproductive Health Law at FDA Law, na ramdam na ng mga kababaihan ang kakulangan ng contraceptives sa merkado dahil hindi lamang aniya para sa iwas-pagbubuntis ang gamit ng mga gamot na ito, bagkus ay lunas din ito sa iba’t ibang sakit ng mga kababaihan.

Ayon kay Dr. Junice Melgar, myembro ng national implementing committee para sa RH Law ng DOH, masyado nang apektado ng TRO ang kakulangan ng mga medisina para sa mga kababaihan. Unti-unti aniyang pinapatay ng TRO ang mga ina ng tahanan dahil noong buwan ng Marso ay 43% porsyento na ng mga contraceptives na natitira sa merkado ay expired na at sa pagtatapos ng taon ay inaasahang 19% porsyento pa ang mag-eexpire. Sa susunod na taon (2018) ay may kabuuang 90% porsyento ang mag-eexpire kaya’t pagsapit ng taong 2020 ay ubos na ang mga ito.

Naniniwala si Dr. Esmeraldo Ilem, isang obstetrician-gynecologist sa Dr. Fabella Memorial Medical Center, na binago ng RH Law ang tagumpay ng family planning program sa bansa subali’t pinigil naman ito ng TRO kaya’t malamang na ang napakagandang hangarin ng programang ito ay napinpinto na ring magwakas kapag hindi tumugon sa panawagan ang mga kinauukulan.

Idinagdag ni Cayetano na walang batayan sa batas ang isinusulong ng mga Pro-Life activists sa pagsesertipika ng mga gamot ng FDA dahil isang paraan lamang aniya ito upang mabalam sa pagpapairal ang RH Law. Nanawagan siya sa Supreme Court na kung may malasakit sila sa mga kababaihan ay alisin na nila ang kontobersyal na TRO sa sertipikasyon ng mga contraceptives at hayaang maibahagi ang mga ito sa merkado.